Afdeel för Unfallchirurgie un Orthopädie

´En beten Statistik

Brüch in de Hüftgegend (ümbi 350 Operationen in`t Johr)

De sünnerlich för öllere Minschen gefährlichen Schenkelhalsbrüch  un de Böverschenkelbrüch  in de Neegde vun de Hüft kaamt veel vör. Dörch moderne stabile Osteosyntheseverfohren so as de Gammanagel un de Dynamische Hüftschruuv un dörch dat schonen Utwesseln vun den Hüftkopp dörch de Duo kopfprothese köönt uns Patienten al  wenige Daag na de Operation wedder op egen Benen stahn un rasch de Rehabilation stationär oder ambulant toföhrt warrn

Brüch an de Böver- un Ünnerschenkel un dat Footskelett (ümbi 200 Operationen in`t Johr)

Moderne Implantate ut Titan oder Stahl , speziell an de enkelten Regionen anpasste Platten, winkelstabile Implantate, Verriegelungsnagels för ünnerscheedliche Etagen un Fixateur-externe-Systeme maakt en hoochqualitative spezifische operative  Versorgung möglich un laat dat baldmöglichste friee Bewegen un fröhe Belasten vun de Benen to.

Sprunggelenksbrüch (ümbi 150 Operationen in`t Johr)

De operative Versorgung maakt den anatomisch exakten Wedderopbuu vun dat Gelenk un de fröhe Bewegungsfrieheit un rasche Belastborkeit mööglich. Se hebbt en heel gode Prognose op vullstännigen Wedderopbuu.

Kneegelenksbrüch (ümbi 50 Operationen in`t Johr)

Düsse Brüch verlangt besünners veel Oppassen, wieldat swore Behinnerungen torüch blieven köönt. De exakte Wedderopbuu vun de Gelenkflächen un de Beenachsen is vun hööchste
Wichtigkeit. Speziell anpaßte Implantate as winkelstabile Platten un dörchbohrte Schruven sünd uns Warktüüg dorbi.

Brüch an Slötelbeen, Schullergelenk, Överarm, Ellengelenk, Ünnerarm un Handgelenk (ümbi 350 Operationen in`t Johr)

De gifft dat veelmals bi Kinner as ok bi opwussen Minschen. Düsse Brüch verlangt konservativ un operativ ganz ünnerscheedliche Behannelmethoden un uns vulle Kompetenz. De Brüch bi Kinner behannelt wi  in enge Tosamenarbeit mit de Kinnerklinik in`t Huus.

Verletzungen an Hand un Finger (ümbi 500 Operationen in`t Johr)

Veelmals sünd dat heel ünnerscheedliche Verletzungen: Snittwunnen, Quetschungen, Brüch, Ümknickungen, Band- un Sehnenverletzungen, Gefäß un Nervenverletzungen, Verbrennungen, Entzündungen, öllere Verletzungen.

Ingrepen an de Warvelsüül bi Brüch (/ümbi 150 Operationen in`t Johr)

Operativet Wedderoprichten vun Warvelbrüch un Stabiliseern dörch Schruven un Fixateur-inerne-Systeme.
Wedderopbuu vun öllere Warvelbrüch, de slecht heelt sünd, dörch operativet Stabiliseern vun den Rüch un vun den Buuk, Bostkorv oder Hals her – dorsale un ventrale Spondylodese.
Innere Stabiliseern dörch minimal-invasive  Zementinsprütten bi exakte Röntgendörchlüchkontroll  - Vertebroplastie - linnert foorts de Wehdaag un laat en rasche Rehabilitation to.

Bandschievenoperation, Stabiliseern bi Versleet-Instabilität vun de Warvelsüül, minimal-invasivet Wiedermaken vun den Spinalkanal bi Spinalkanalstenose, Inbuu vun Bandschievenersatz an de Halswarvelsüül (ümbi 150 Operationen in`t Johr)

Dörch minimal-invasive Wiedermaken un lichtere Ingrepen ward Wehdaag linnert. Funktionsstörungen vun dat Geföhl un de Motorik betert un afstellt un de Funktion vun uns so wichtiget Achsenorgan wedder kraftvull opbuut.

Operationen an de Hannen bi reten Sehnen, Bänner un Kapseln, bi Dupuytrenscher Kontraktur, bi Karpaltunnelsyndrom, Ulnarisrinnesyndrom oder Supinatorlogensyndrom (ümbi 150 Operartionen in`t Johr)

Spegeln- Arthroskopie – vun dat Kneegelenk un dat Schullergelenk (ümbi 800 Operationen in`t Johr).

Reten Meniskus, Knorpelschaden, Siedenbandriß, Krüzbandriß, Quetschungen vun den inneren Fettkörper, friee Gelenkkörper, Rotatorenmanschettenruptur, Limbusabrisse, Spölen bi Infekt.

Rekonstruktive Ingrepen an de Fööt(ümbi 50 Operationen in`t Johr)

Hallux valgus, Hammertohn, Krallentohn, Arthrose an den Footwuddelknaken, Fersensporn, Tarsalttunnelsyndrom.

Operationen bi slecht heelte Knakenbrüch (ümbi 50 Operationen in`t Johr)

Repareern vun Achsfehlstellungen an Röhrenknaken, stabile Weddertosamensetten vun Pseudarthrosen - nich heelte Knakenbrüch - ,Wedderopbuu vun fehlstahn Gelenkflächen.

Ersatz vun Hüftgelenken dörch Totalendoprothese (ümbi 300 Operationen in`t Johr)

Modernste un hochqualitative Gelenkimplantate, mit oder ahn Zement, maakt rasche Belastbarkeit un Wedderherstellung möglich.

Ersatz vun Kneegelenken dörch Totalendoprothesen (Ümbi 80 Operationen in`t Johr)

Hier kaamt moderne, gering invasive Böversietprothesen un bi starken Versleet stabile achsföhrte Endoprothesen to`n Insatz – de hoolt lang för.

Wesseloperationen vun Endoprothesen, de nich mehr fast sitt oder enen Infekt hebbt, an Hüften un Kneen (ümbi  50 Operationen in`t Johr)

Dat sünd hooch komplizeerte Operationen, de wi in enge Tosamenarbeit mit de besten Implatathersteller un mit bakteriologisch Laboren vörnehmt.

Behanneln vun Brüch   bi Kinner, Brüch vun Böverarms, Ellengelenken, Ünnerarms, Böver- un Ünnerschenkels (ümbi 150 Operationen in`t Johr)

Uns Kinnerpatienten sünd keen lütte opwussen Minschen, se kriegt veelmehr en ganz op Kinner tosneden Behanneln in Tosamenarbeit mit de Dokters un Plegers op de Kinnerstation in uns Huus. Dat versteiht sik, dat de Öllern, wenn se dat wüllt, bi ehr Kinner blieven köönt. Se maakt dordörch uns Kinner de tomeist korte  Krankenhuusbehanneln lichter.